Հայաստանի պարա աթլետիկայի հավաքականը կմասնակցի Շվեյցարիայի Նոթվիլ քաղաքում կայանալիք Գրան Պրի մրցաշարին

Հայաստանի պարա աթլետիկայի հավաքական թիմը մայիսի 18-24-ը կմասնակցի Շվեյցարիայի Նոթվիլ քաղաքում անցկացվելիք Աշխարհի պարա աթլետիկայի Գրան Պրի մրցաշարին։

Մրցաշարին կմասնակցի Հայաստանի 6 մարզիկներից կազմված հավաքականը՝ գլխավոր մարզիչ-թիմի ղեկավար Հովհաննես Գևորգյանի և ավագ մարզիչ Սուսաննա Մարտիրոսյանի գլխավորությամբ։

Հավաքականի կազմում ընդգրկված են սայլակավազորդներ Գոհար Նավասարդյանը (T53), Սմբատ Կարապետյանը (T54) և Արման Սարգսյանը (T54), որոնք հանդես կգան 100, 200, 400 և 800 մետր վազքատարածություններում։

Վազքուղում պայքարի մեջ կմտնի նաև Դավիթ Խաչատուրյանը (T36), որը կմրցի 100, 200, 400 և 800 մետր վազքատարածություններում։

Նետումների մրցաձևերում Հայաստանի հավաքականը կներկայացնեն Սարգիս Մխիթարյանը (F57) և Կարեն Տոնոյանը (F56), որոնք հանդես կգան գնդի հրում մրցաձևում։

Մրցաշարը կարևոր նշանակություն ունի հայ մարզիկների համար, քանի որ այն հանդիսանում է Աշխարհի 2027 թվականի առաջնության ուղեգրերի համար պայքարի փուլերից մեկը։ Միևնույն ժամանակ, Աշխարհի առաջնությանը մասնակցությունը ներառված է 2028 թվականի Պարալիմպիկ խաղերի ճանապարհային քարտեզում։

Հավաքականի մասնակցության ֆինանսավորումն իրականացվում է պետական բյուջեի միջոցների հաշվին՝ ՀՀ կրթության, գիտության, մշակույթի և սպորտի նախարարության և Պարալիմպիկ կոմիտեի միջև կնքված 2026 թվականի դրամաշնորհային պայմանագրի շրջանակում։